Amerika Birləşmiş Ştatları (ABŞ) uzun illər boyu xarici ölkələrdə daha yaxşı həyat sürməyə, fəlakətin nəticələrini aradan qaldırmağa, azad və demokratik ölkədə yaşamağa can atan insanlara yardım əli uzadıb.
ABŞ-ın xarici ölkələrə yardımı daim onun xarici siyasət maraqlarına xidmət edib. Bu maraqlar həm demokratiyanı və azad bazarları genişləndirmək, həm də inkişaf etməkdə olan ölkələrin vətəndaşlarının həyat səviyyəsini yaxşılaşdırmaqdan ibarətdir. USAİD bu məqsədlərə nail olmaq üçün bütün dünyada fəaliyyət göstərir.

USAİD-in tarixçəsi

USAİD-in tarixçəsi İkinci Dünya Müharibəsindən sonra Avropanın yenidən qurulmasına həsr olunmuş Marşall Planından və Truman hökumətinin Dördüncü Bənd Proqramından başlayır. 1961-ci ildə ABŞ Prezidenti Con Kennedi Xarici Ölkələrə Yardım Aktını imzalayaraq, bu aktı qanuna çevirib və icraçı qərara əsasən USAİD donor agentliyini yaradıb.
O vaxtdan bəri USAİD, fəlakətin nəticələrini aradan qaldıran, kasıbçılıqdan qurtulan, demokratik islahatlara qatılan ölkələrə köməyini əsirgəməyən, ABŞ-ın aparıcı donor agentliyi kimi fəaliyyət göstərir.
USAİD müstəqil federal hökumət təşkilatıdır. O, ümumi siyasi istiqamət haqqında göstərişləri dövlət katibindən alır. USAİD uzunmüddətli və ədalətli iqtisadi inkişafa dəstək verir və aşağıda sadalanan sahələrə yardım etməklə ABŞ-ın xarici siyasət məqsədlərini irəli çəkir:
• iqtisadi inkişaf, kənd təsərrüfatı və ticarət;
• ümumdünya səhiyyə;
• demokratiya, münaqişələrin qarşısının alınması və humanitar yardım.
USAİD dünyanın dörd bölgəsinə yardım edir:
• Afrika ölkələri;
• Asiya və Yaxın Şərq;
• Cənubi Amerika və Karib adaları;
• Avropa və Avrasiya.
Baş qərargahı Kolumbiya əyalətinin Vaşinqton şəhərində yerləşən USAİD təşkilatının qüdrəti bütün dünyada fəaliyyət göstərən idarələrindən ibarətdir. USAİD özəl könüllü təşkilatlar, yerli təşkilatlar, ali təhsil ocaqları, Amerika biznes qurumları, beynəlxalq təşkilatlar, ABŞ və digər ölkə hökumətləri ilə əməkdaşlıq şəraitində işləyir. USAİD 3.500-dən artıq Amerika şirkəti və ABŞ-in 300-dən artıq özəl könüllü təşkilatı ilə işgüzar əlaqələrə malikdir.

Ədalətli və demokratik idarəetmə

ABŞ Beynəlxalq İnkişaf Agentliyinin (USAİD) demokratiya və idarəetmə sahəsindəki fəaliyyətləri qanunun aliliyini təkmilləşdirmək, inkişaf etdirmək, vətəndaş cəmiyyətinin inkişafına zəmin yaratmaq, azad və ədalətli seçkilərə köməklik göstərmək, siyasi partiyaları möhkəmləndirmək və müstəqil kütləvi informasiya vasitələrini dəstəkləmək məqsədi daşıyır.
Azərbaycan xalqının daha böyük qisminə iqtisadi inkişaf və siyasi plüralizmin faydasını təqdim etmək üçün USAİD həm hökumət, həm də icraçı partnyorlar ilə konstruktiv münasibət yaratmağa səy göstərib.

USAİD Azərbaycanda

USAID ölkəmizdə ən çox layihə həyata keçirən və böyük uğur qazanan təşkilatlardan biridir. Buyurun, həmin layihə və uğurlarla siz də tanış olun: 

- USAİD Azərbaycanın Birgə Seçki Məcəlləsi layihəsini hazırlamağa və seçki üzrə işləyən məmurlara təlim keçməyə köməklik göstərib.

- Siyasi partiyaların gücləndirilməsi, seçicilərin maarifləndirilməsi və müstəqil KİV layihələri vasitəsilə prezident seçkiləri üçün fəal çoxpartiyalı kampaniyanın ərsəyə gətirilməsinə köməklik göstərib.

- Yeddi regional televiziya stansiyasını yeni translyasiya stansiyası ilə təmin edib, bununla da onların əhatə dairəsinin genişləndirməsi üçün şərait yaradılıb.

- Rabitə və İnformasiya Texnologiyaları Nazirliyi üçün rəqəmsal tezlik xəritəsi yaradıb və ölkədə televiziya və radio şirkətlərinin necə paylandığını müəyyən edib.

- Anti-korrupsiya üzrə üç hüquqi məsləhət və ictimai maraqların müdafiəsi mərkəzi yaradıb.
USAİD-in «Qanunun Aliliyi» proqramı çərçivəsində Azərbaycanda ilk dəfə Qadın Hüquqşünaslar Assosiasiyası yaradılıb.