Beynəlxalq Böhran Qrupu (BBQ) müstəqil və heç bir kommersiya marağı olmayan beynəlxalq təşkilatdır. BBQ öz professional kollektivi ilə dünyanın 5 qitəsində fəaliyyət göstərir. Təşkilatın əsas məqsədi konfliktlər barəsində əvvəlcədən proqnozlar hazırlamaq və onların qarşısının alınması üçün tövsiyələr vermək, fəaliyyət göstərməkdir.
BBQ-nin əsas metodologiyası birbaşa yerlərdə araşdırma aparmaqdır. Qrupun siyasi analitikləri təhlükə olan və təhlükə gözlənilən ölkələrdə geniş diapozonlu mənbələrdən lazımi informasiyalar toplamaq və vaxtaşırı analitik hesabatlar hazırlamaqla məşğuldurlar. Bu hesabatlarda böhranların qarşısını almaq üçün praktiki məsləhətləri yerli və beynəlxalq təşkilatlara ünvanlamaq və cavabdehlərdən lazımi qərarlar qəbul edilməsi istənilir. Böhran qrupu həmçinin aylıq “Crisis Watch” adlı informasiya bülleteni hazırlayaraq konfliktlər olan və potensial konflikt zonaları sayılan ölkələrdəki vəziyyətlə bağlı qısa xülasələr təqdim edir. Böhran qrupunun hesabatları  və keçirilən brifinqlər yerli xarici işlər nazirliklərinin təmsilçilərinin və beynəlxalq təşkilatların da diqqətinə çatdırılır. Bu hesabatlar və brifinqlər təşkilatın www.crisisgroup.org adlı web saytı vasitəsiylə geniş ictimaiyyətə çatdırılır. Təşkilat həmçinin hakimiyyət və mətbuatla sıx əməkdaşlıq edərək gördüyü işə dəstək axtarmağa çalışır. Böhran qrupunun məsləhət şurasına görkəmli siyasi xadimlər, diplomatlar, biznesmenlər, kütləvi informasiya vasitələrinin təmsilçiləri daxildirlər. Bu, onun üçündür ki, BBQ-nin hesabatları və təklifləri bütün dünya üzrə siyasi məsləhətlərlə məşğul olan vacib şəxslərin diqqətinə çatdırılsın.
Avropa İttifaqının keçmiş komissarı Kris Patten təşkilatda xarici əlaqələr, lord Barns isə məsləhət şurasının təmsilçiləridir. Avstraliyanın keçmiş xarici işlər naziri  isə 2000-ci ilin yanvarından Beynəlxalq Böhran Qrupunun prezidentidir.
Beynəlxalq Böhran Qrupunun mənzil qərargahı Brüsseldə, təmsilçilikləri isə Vaşinqton, Nyu-York, London və Moskvada yerləşir.
Hazırda təşkilat 13 təmsilçiliyə malikdir. Təşkilatın analitikləri 4 qitənin 50-dən çox ölkəsində işləyir. Afrikada Anqola, Brundi, Kot-d-İvuar, Konqo Demokratik Respublikası, Efiopiya, Eritreya, Qvineya, Liberiya, Ruanda, Sera- Lione və s., Asiyada  Əfqanıstan, Kəşmir, Qazaxıstan, Qırğızıstan, İndoneziya, Myanma, Türkmənistan, Özbəkistan və s.,
Avropada Albaniya, Ermənistan, Bosniya və Hersoqovina, Gürcüstan, Kosovo, Makedoniya, Moldova, Çernoqoriya və Serbiya kimi ölkələr, Yaxın Şərqdə Şimali Afrikadan İrana qədər bütün qaynar nöqtələr, Latın Amerikasında Kolumbiya, And və Haiti regionları BBQ-nin davamlı fəaliyyət göstərdiyi yerlərdir.
Böhran qrupunun Azərbaycandakı fəaliyyəti də təqdirə layiqdir. Təşkilat ölkəmizdə aktiv şəkildə fəaliyyət göstərir. BBQ ölkədə baş verən proseslərlə yaxından maraqlanır və vaxtaşırı öz məsləhətlərini, təkliflərini irəli sürür.
Beynəlxalq Böhran Qrupunun Azərbaycan hökumətinə  verdiyi məsləhətlər belə ümumiləşdirilir:
- tez bir zamanda sosial və iqtisadi inkişafı Bakıdan kənarda və qeyri-neft sektoru vasitəsilə yüksəltmək, investisiya şəraitini yaxşılaşdırmaq;
- dövlət gəlirlərini pensiya və maaşların yüksəlməsinə cəlb etmək, həmçinin səhiyyə sahəsində korrupsiya ilə mübarizə aparmaq.
- 2003-cü ilin oktyabrında keçirilən prezident seçkilərindən sonra hakimiyyətin siyasi opponentlərinə və seçki komissiyalarındakı müxalifət nümayəndələri ilə bağlı qanunsuzluğa yol vermiş  hüquq-mühafizə orqanlarında ciddi araşdırmalar aparmaq;
- Dini Qurumlarla İş üzrə Dövlət Komitəsində dini təşkilatların qeydə alınması prosedurlarını yüngülləşdirmək, onları daha şəffaf və tolerant prosedurlarla əvəz etmək, ümumiyyətlə, dini məsələlərlə bağlı daha demokratik siyasət yürütmək;
- Avropa Şurasının siyasi məhbuslar və həbsdə olan müstəqil KİV-lərin nümayəndələri ilə bağlı tələblərini yerinə yetirmək;
- Korrupsiya ilə bağlı müstəqil və uzunmüddətli qurumun yaradılmasını təşkil etmək və bu sahədə vacib islahatlar aparmaq.