IREX dünyanın bir çox  ölkəsində fəaliyyət göstərən qeyri-kommersiya təşkilatı olub, liderlik və innovasiya proqramlarının əsas təminatçılarından biri sayılır. Təşkilat həmçinin təhsilin keyfiyyətinin yaxşılaşdırılması, müstəqil mətbuatın inkişaf etdirilməsi, vətəndaş cəmiyyətində plüralizmin inkişafı istiqamətində fəaliyyət göstərir.
1968-ci ildə yaradılan IREX illik 50 milyon dollarlıq büdcəyə və bütün dünyada fəaliyyət göstərən 400-dən artıq peşəkar işçiyə malikdir.
IREX və onun partnyoru IREX Avropa hazırda dünyanın 50-dən çox ölkəsində fəaliyyət göstərir. Təşkilatın Azərbaycandakı fəaliyyəti  1998-ci ildən başlayır və bu günədək davam edir. IREX Azərbaycanda bir çox proqramlar həyata keçirir və ən fəal beynəlxalq təşkilatlardan biri kimi tanınır.
Təşkilat bir çox sahələrdə iş görməklə yanaşı, ABŞ Dövlət Departamentinin həyata keçirdiyi qlobal tədris mübadiləsi üzrə proqramın yönləndiricisidir. Bu proqram ayrı-ayrı ölkələrdən olan tələbələrə Amerikanın müxtəlif universitetlərində və kolleclərində oxumaq imkanı yaradır. Həmin ölkələr arasında Azərbaycan, Ermənistan, Belarus, Gürcüstan, Qazaxıstan, Qırğızıstan, Rusiya Federasiyası, Moldova, Tacikistan, Türkmənistan, Ukrayna və Özbəkistan da var.
Amerikaya təhsil ardınca gedən tələbələrə hər cür şərait yaradılır. Onlara yüksək təhsil almaq, praktikalarda iştirak etmək imkanı yaradılmaqla yanaşı, xüsusi ailələrdə yaşamaq imkanı da verilir. Bundan başqa tələbələrə dövlət tərəfindən aylıq təqaüd ayrılır, onların sağlamlığı siğortalanır, həmçinin dərs vəsaitləri ilə təmin olunurlar. Onlara akademik səviyyədə ingilis dili öyrədilir.  Amerikada təhsil almaq istəyənlər öz istəklərinə uyğun olaraq, aşağıdakı elm sahələrini seçmək şansı  verilir:

- Menecment;
- İqtisadiyyat;
- Təhsil;
- Ekologiyanın yaxşılaşdırılması;
- Beynəlxalq münasibətlər;
- Jurnalistika və KİV;
- Kitabxana və İnformatika;
- Dövlət qulluğu;
- Səhiyyə;
- İctimai asayiş.

Bütün bunlarla yanaşı, Avrasiya və Cənubi Asiya üzrə həyata keçirilən təhsil proqramında qalib gələnlər 6 həftəlik təhsil üçün Birləşmiş Ştatlar Universtitetlərinə göndərilir. Bu proqramın qalibləri də Amerikada qaldıqları müddətdə yüksək təhsil və təcrübə keçmək imkanına malik olurlar.
IREX Azərbaycanda ən çox layihə həyata keçirən təşkilatlardan biridir. Qurum yalnız paytaxt Bakıda deyil, ölkənin bir çox regionlarında xüsusi layihələr reallaşdırır. Buna misal olaraq, Lənkəranda həyata keçirilən mədəniyyət - online proqramının tətbiqi layihəsini göstərə bilərik. Bu layihənin əsas məqsədi tələbələrə öz mədəniyyətləri ilə yanaşı, başqa xalqların mədəniyyətini də dərindən öyrətməkdir. IREX Lənkəranda fəaliyyət göstərən könüllülər korpusunun yardımı ilə tələbələrdə Lənkəran və bütövlükdə Azərbaycanın ənənələri barədə daha real təsəvvürlərin yaradılmasına nail olub.
Təşkilat gün-gündən inkişaf edir. IREX öz əhatə dairəsini genişləndirmək üçün durmadan irəli addımlar atmaqdadır.